Ubwo Minisitiri w’imari n’igena migambi Murangwa Yousuf, yatangarizaga abagize inteko ishingamategeko imitwe yombi uko ingengo y’imari umwaka utaha wa 2026-2027 izaba imeze, yanagarutse no ku byakozwe mu mwaka w’ingengo y’imaru uri gusozwa avuga ko nko mu rwego rw’ubutebera hagarujwe miliyoni 729 Frw ndetse n’ibihumbi 5 by’Amadolari ya Amerika yagombaga kunyerezwa.
Yabigarutseho kuri uyu wa Kane tariki 11 Kamena ubwo yagezaga ku Nteko Ishinga Amategeko ihuriweho n’Imitwe yombi umushinga w’Itegeko rigena Ingengo y’Imari ya Leta y’umwaka wa 2026/2027.
Mu kiganiro cye, Minisitiri Murangwa yavuze ko mu rwego rw’ubutabera hari ibikorwa bitandukanye byagezweho birimo kugaruza umutungo wa Leta wari waranyerejwe ndetse no gukomeza kwegereza abaturage ubutabera.
Yavuze ko amafaranga yagarujwe agaragaza imbaraga Leta ikomeje gushyira mu kurwanya inyerezwa ry’umutungo wa rubanda no gukurikirana abakoresha nabi umutungo wa Leta.
Minisitiri Murangwa yavuze kandi ko ubutabera bukomeje kwegerezwa abaturage binyuze mu ruhare rw’abunzi mu gukemura amakimbirane.
Ati: “Mu rwego rwo gukomeza kwegereza abaturage ubutabera no gushimangira uruhare rwabo mu kwikemurira amakimbirane, abunzi bakiriye imanza 14,500 murizo 14,400, zingana na 99% zarakemuwe.”
Minisitiri Murangwa yanagarutse kuri gahunda yo gufasha abaturage batishoboye kubona ubutabera. Yavuze ko muri gahunda yo gutanga ubufasha mu by’amategeko ku baturage batishoboye ndetse n’abatagejeje imyaka y’ubukure, urugaga rw’abavoka rwafashije abantu 2700 kubona ubutabera.
About the Author
