RDC : Perezida Tshisekedi yavuze ko atazihorera cyangwa ngo ahigishe abamuhemukiye uruhindu

Perezida wa Repubulika iharanira Demokarasi ya Congo, Felix Tshisekedi Tshilombo kuri uyu wa Kabiri, itariki 05 Gashyantare yageze iLuanda muri Angola mu ruzinduko  rw’akazi rw’amasaha macye ari narwo rwa mbere agiriye hanze y’igihugu kuva yarahirira kuyobora igihugu kuwa 24 Gashyantare. Mu kiganiro n’itangazamakuru yasubije ibibazo birimo icy’amasezerano avugwaho kugirana na Kabila.

Nk’uko byatangajwe n’Ibiro Ntaramakuru bya Angola (Angop), Felix-Antoine Tshisekedi wasuye Angola ku butumire bwa mugenzi we, Joao Lourenco, yakiriwe ku ngoro y’umukuru w’igihugu bagirana ibiganiro mu muhezo byakurikiwe no gusangira.

Mu kiganiro bahaye itangazamakuru nyuma yo kuganira, Perezida Tshisekedi yarengeye imbere ya mugenzi we wa Angola itorwa rye ritavuzweho rumwe nubwo yemera ko hari utubazo twagaragaye mu matora, ariko ashima ko mu gihugu bwa mbere habayeho guhererekanya ubutegetsi mu mahoro. Ati: “Ni ubwa mbere tugize amatora atarimo ubugizi bwa nabi.”

Umunyamakuru yamubajije kuri Martin Fayulu bari bahanganye muri aya matora ndetse utaremeye ibyayavuyemo ahubwo agashimangira ko yagize amajwi 61%, Tshisekedi ati: “Ndacyategereje ibimenyetso. Nta kintu ndabona.”

Undi munyamakuru nk’uko tubikesha RFI yamubajije ku masezerano bivugwa ko yagiranye na Joseph Kabila agamije kugabana ubutegetsi, ariko we avuga ko habaye ibiganiro yavuze ko byatangiye hagati y’itangazwa ry’ibyavuye mu matora by’agateganyo n’itangazwa rya nyuma.

Ati: “Nahisemo kohereza ubutumwa bw’ihumure kuri Bwana Joseph Kabila n’inshuti ze mvuga ko kujya ku butegetsi kwanjye kutazaba umwanya wo guhiga umuntu cyangwa abarozi (une chasse à l’homme ou une chasse aux sorcières) cyangwa gutangira kwihorera.

Perezida Tshisekedi ari kumwe na Perezida wa Angola

Tshisekedi yakomeje avuga ko bazafatanya kuyobora igihugu kandi bakemeranya kuri gahunda bazafata avuga ko zizatuma leta ikomeza kubaho kubw’ahazaza h’Abanyekongo aho kwihorera.

Ku ruhande rwe, perezida wa Angola, Joao Lourenco, yashimiye mugenzi we wa Congo, avuga ko kugera ku butegetsi kwa Tshisekedi ari uburyo bwo guha umurongo mushya umubano w’ibihugu byombi. Abayobozi bombi bakaba bemeranyije gukomeza imishinga ibihugu byombi bihuriyeho irimo gukorwa ariko bakazazana n’indi mishya ndetse hatirengagijwe ubucuruzi hagati y’ibihugu byombi.

Biteganyijwe ko nyuma ya Angola Perezida Felix Tshisekedi azagenderera igihugu cya Kenya nyuma akajya muri Congo Brazzaville mu rwego rwo gutsura umubano n’ibindi bihugu mu buyobozi bushya.

Kwirakwiza

Leave a Reply

Your email address will not be published. Required fields are marked *