Umuhanzi Bushali na mugenzi we uruiko rwategetse ko bakomeza gufungwa by’agateganyo

Hagenimana Jean Paul [Bushali] na Nizeyimana Slum [Slum Drip] bazwi mu njyana ya Kinyatrap na Uwizeye Carine bakurikiranyweho icyaha cyo gukoresha ibiyobyabwenge kuri uyu wa Mbere tariki 4 Ugushyingo 2019 urukiko rwategetse ko bafungwa iminsi 30 y’agateganyo, mu gihe Uwase Nadia we yahise arekurwa nk’uko Ubushinjacyaha bwabimusabiye.

Tariki 18 Ukwakira 2019 nibwo itsinda ry’abantu bane bafatiwe mu Nyakabanda bakurikiranyweho icyaha cyo gukoresha ibiyobyabwenge.

Bagejejwe mu rukiko ku wa 30 Ukwakira 2019, bose bunganiwe n’umunyamategeko Kadage Laban.

Ubwo baburanaga Umushinjacyaha yatangiye abwira urukiko impamvu zikomeye zatumye abaregwa bagezwa mu rukiko.

Impamvu ya mbere yatanze ni iy’uko bafatanywe urumogi bikekwa ko banyweye ndetse n’icupa ry’ifu y’urwo banyweye.

Umushinjacyaha yasobanuye ko ifatwa ry’aba ryabayeho nyuma y’uko baraye mu nzu y’uwitwa Ismail Hadji bityo umubyeyi we yabyuka akumva umunuko w’urumogi ndetse akanabona abantu atazi baraye mu nzu y’umuhungu we bityo akiyambaza inzego zishinzwe umutekano.

Ubushinjacyaha kandi bwavuze ko bushingira ku buhamya bw’abatangabuhamya babajijwe bagahamya ko bazi neza ko abaregwa bakoresha ibiyobyabwenge.

Usibye ibi bimenyetso ubushinjacyaha bwavuze kandi ko bushingira ku byemezo bya muganga wabapimye akabasangamo ibiyobyabwenge mu mubiri.

Icyo gihe ubushinjacyaha bwasabiye batatu mu baregwa gufungwa by’agateganyo mu gihe uwitwa Uwase Nadia we bwamusabiye kurekurwa kuko raporo ya muganga igaragaza ko nta biyobyabwenge yigeze akoresha.

Aha ubushinjacyaha bwavuze ko Uwase yakurikiranwaho icyaha cyo guhishira abakoze icyaha no kudatanga amakuru ku gihe. Icyakora bwongeraho ko bumusabira kuba yakurikiranwa ari hanze.

Baburana, Bushali na Slum Drip bo bemereye urukiko ko kera bakoreshaga urumogi ariko ko bari bamaze amezi ane bararuretse kubera akazi gatandukanye bari bamaze igihe bakora.

Bushali yabwiye urukiko ko aho bafatiwe bahagiye bashaka kuruhuka kuko bari bamaze ijoro ryose mu kabari kazwi nka Sun City bwabakeraho bagahitamo kuharuhukira kuko byari bigoye ko bataha iwabo.

Avuga ko ubwo bafatwaga basatswe ntibasanganwa urumogi ndetse n’ababafashe babanje kubinukiriza kandi icyo gihe nta rumogi rwabanukagaho.

Ubunganira mu mategeko avuga ko nyiri urugo bafatiwemo yabyutse akabona inkweto z’umukobwa hanze agatera hejuru avuga ko umuhungu we atahana abakobwa, nyuma abari baryamye imbere barasohotse ngo bamusobanurire we ahitamo gutabaza.

Yavuze ko ikote ryasanzwemo urumogi atari iry’abakiliya be ahubwo ari iry’umuhungu wa nyiri urugo bityo ko yakabaye ariwe uryozwa ibyasanzwe mu ikote rye aho kubiryoza abo yunganira.

Uwizeye Carine we icyo gihe yavuze ko atigeze anywa urumogi uwo munsi ndetse raporo ya muganga yamusanzemo urwo yanyweye kera kuko yari amaze igihe aruretse.

Uwase we yavuze ko yageze muri urwo rugo agiye kuryama ngo aze kubyukira mu kazi, yongeyeho ko iby’urumogi ntabyo azi atigeze arunywa ndetse ashimangira iby’ubushinjacyaha bwavuze ko yarekurwa agakurikiranwa ari hanze.

Avuga ko nta makuru yahishe kuko ntayo yari azi dore ko yageze muri urwo rugo akaryama akaza gukangurwa n’isaha yari yashyizeho imubyutsa ngo ajye ku kazi.

Kuri uyu wa Mbere tariki 4 Ugushyingo 2019 mu rukiko rw’Ibanze rwa Nyamirambo basomye imyanzuro y’urukiko ivuga ko Hagenimana Jean Paul [Bushali], Nizeyimana Slum [Slum Drip], Uwineza Carine bafungwa iminsi 30 y’agateganyo mu gihe hagishakishwa ibimenyetso.

Bose nta numwe wari wigeze yitabira iri somwa yewe yaba ubushinjacyaha ndetse n’ubunganira mu mategeko ntawahagaragaye. Icyakora icyumba cy’iburanisha cyo cyari cyakubise cyuzuye abafana b’aba bahanzi, inshuti n’abavandimwe kimwe n’itangazamakuru ryari ryitabiriye ku bwinshi kumva imyanzuro y’Urukiko.

Urukiko rushingiye ku kuba; bemera ko basanzwe mu nzu yasanzwemo urumogi ndetse bakemera ko urumogi rwasanzwe mu nzu barimo. Urukiko rwatesheje agaciro icyo kuba bamaze igihe baretse urumogi.

Raporo ya muganga igaragaza ko Uwase atigeze anywa urumogi n’ubuhamya bw’umuvandimwe wahamirije ubugenzacyaha ko uyu mwana atanywa urumogi kubera uburwayi asanganywe rwasanze nta mpamvu yo gukurikiranwa afunzwe.

Urukiko rwasanze hari impamvu zikomeye zituma abaregwa bakurikiranwa bafunzwe nk’uko zatangajwe n’ubushinjacyaha. Urukiko rwanzuye ko abaregwa bose bagomba gufungwa by’agateganyo kugira ngo badasibanganya ibimenyetso cyangwa ngo batoroke ubutabera.

Icyifuzo cyabo cyo gutanga ingwate bakaburana bari hanze na cyo urukiko rwagiteye utwatsi. Uwase Nadia urukiko rwategetse ko agomba guhita afungurwa nyuma yo gusoma uru rubanza, mu gihe abasigaye bagomba gufungwa by’agateganyo mu minsi 30. Bakaba bashobora kujuririra iki cyemezo bitarenze iminsi 15.

 

Kwirakwiza

Leave a Reply

Your email address will not be published. Required fields are marked *