Urubanza rwo gutesha agaciro cyamunara y’imitungo y’abo kwa Rwigara rugiye kuburanishwa

Urukiko Rwisumbuye rwa Gasabo rwemeye kwakira ikirego cy’uruganda rw’itabi rwa Rwigara gisaba gutesha agaciro cyamunara y’imitungo yarwo.

Ni icyemezo cyasomewe mu cyumba cy’urukiko baba abanyamategeko bahagarariye abaregwa, uhagarariye ikigo MM&RGD cyatsindiye cyamunara, ndetse n’umunyamategeko uhagarariye uruganda rw’itabi rwa Rwigara badahari.

Mu rukiko hagaragaye gusa Uwamahoro Anne Rwigara umuyobozi w’uruganda Premier Tobacco Company Ltd akaba n’umunyamigabane muri uru ruganda. Uyu akaba ari nawe washyize umukono ku cyemezo  cyafashwe n’umucamanza mu Rukiko Rwisumbuye rwa Gasabo.

Kuri uyu wa Mbere nibwo umucamanza mu rukiko rwisumbuye rwa gasabo yari yiteze kuburanisha urubanza mu bujurire. Ni urubanza uruganda rw’itabi rwa Rwigara rurega rusaba gutesha agaciro cyamunara yakozwe ku mitungo yarwo.

Abanyamategeko bunganira ikigo cy’igihugu cy’imisoro n’amahoro, abunganira umuhesha w’inkiko w’umwuga, Me Vedaste Habimana, n’uhagarariye MM&RGD Ltd Company yatsindiye icyamunara bahise bagaragaza inzitizi.

Babanje kuvuga ko umucamanza mu rukiko rw’ibanze rwa Kacyiru mu Mujyi wa Kigali yaburanishije uru rubanza kandi ngo rwaragombaga kuburanishirizwa mu nkiko z’ubucuruzi, bavuga ko n’ubusanzwe hatejwe cyamunara imitungo y’uruganda rw’ubucuruzi, bavuga ko umucamanza yaburanishije uru rubanza atabifitiye ububasha.

Umunyamategeko wunganira uruganda rwa nyakwigendera Assinapol Rwigara we avuga ko amategeko asobanura ko iiyo habayeho cyamunara uruhande rumwe ntirunyurwe n’imigendekere yayo, ruregera urukiko rwegereye aho cyamunara yabereye. Iyi cyamunara ikaba yarabereye i Masoro mu Karere ka Gasabo mu cyanya cy’inganda, ku biro by’ikigo cy’igihugu cy’imisoro n’amahoro.

Indi nzitizi yazamuwe n’impande ziregwa muri uru rubanza yasabaga umucamanza mu Rukiko Rwisumbuye rwa Gasabo, kutakira ikirego cy’ubujurire uruganda rw’itabi PTC rusaba gutesha agaciro cyamura ya Fonds de commerce y’uruganda yabaye ku mitungo yarwo.

Uruganda rw”itabi PTC nirwo rwagarutsweho cyane muri izi cyamunara

Me Pierre Munyangabe uhagarariye ikigo cya MM&RGD yatsinze cyamunara ndetse na bagenzi be bunganira RRA, n’umuhesha w’inkiko w’umwuga, Me Vedaste Habimana bavuga ko, iri zina PTC (Premier Tobacco Company) ryagurishijwe ritakiriho.

Aba basanga nta n’impamvu yo kugirango uruganda PTC rutange ikirego rukoresheje iryo zina kuko ngo ryarangije guhabwa ikigo cya MM&RGD.

Nubwo umucamanza atafashe umwanya wo gusobanura ingingo ku yindi yashingiyeho atera utwatsi izi nzitizi, yavuze ko yaba inzitizi y’iburabubasha ku mucamanza wamubanjirije ku rwego rwa mbere aburanisha uru rubanza nta shingiro ifite.

Yavuze umucamanza mu rukiko rw’ibanze rwa Kacyiru yari afite ububasha bwo kuburanisha uru rubanza, aba ari nako abigenza ku nzitizi y’iburabubasha ku baregera gutesha agaciro cyamunara yakozwe ku mitungo y’uruganda rw’itabi rwa PTC. Aha naho yavuze ko ubusabe bw’abaregwa nta shingiro bufite, ategeka ko urubanza rugomba kuburanishwa mu bujurire kandi vuba kuko ngo ari ikirego kigomba kuburanishwa mu buryo bwihuse.

Uruganda rw’itabi rwa Nyakwigendera Assinapol Rwigara rurega Ikigo cy’Igihugu cy’Imisoro n’Amahoro n’Umuhesha w’Inkiko w’Umwuga, Vedaste Habimana, guteza mu cyamunara imitungo yarwo mu buryo ruvuga ko bunyuranyije n’amategeko.

Ni cyamunara ya Fonds de commerce y’uruganda yagurishijwe imitungo ifatika n’idafatika irimo n’izina ry’uruganda yabaye ku itariki 03 Ukwakira 2018 ivamo miliyoni 75 z’amafaranga y’u Rwanda.

Abahagarariye uru ruganda bakaba bavuga ko batamenyeshejwe aho cyamunara yagombaga kubera n’igihe yagombaga kubera, igenagaciro ryayo n’ibindi byari biyerekeyeho ari naho bahera basaba kuyitesha agaciro.

Muri Gashyantare uyu mwaka nibwo umucamanza mukuru ku rwego rwa mbere mu Rukiko rw’Ibanze rwa kacyiru yemeje ko iyi cyamunara yakozwe mu buryo butubahirije amategeko, ategeka ko igomba guhama uko iri. Iki cyemezo ntabwo cyanyuze ba nyiri imitungo biba ngombwa ko bakijuririra.

Mu kayabo ka miliyari zikabakaba esheshatu z’amafaranga y’u Rwanda RRA yishyuza PTC, ufatiye ku mitungo yarwo imaze guteza mu cyamunara bigaragara ko hakibura andi asaga miliyari eshatu ngo umwenda ube urangiye.

Ni umwenda umuryango wa Rwigara utemera ukemeza ko ushingiye ku nyungu za politiki.

Biteganyijwe ko urubanza mu bujurire  ruzaburanishwa kuri uyu wa Kane, itariki 28 Werurwe 2019

 

Kwirakwiza

Leave a Reply

Your email address will not be published. Required fields are marked *